BENVIDO, 2015!!!

QUE NO 2015 SE CUMPRAN TODOS OS VOSOS SOÑOS!!!

O NADAL DE PERELLA.

Non quixo Perella pasar sen desexarnos unhas Felices Festas e pasouse pola aula para deixarnos uns chocolates de Nadal. Tamén nos trouxo unha carta en contestación á nota que lle enviara Daniel.Creo que xa nos quedou claro que as cousas debemos facelas con antelación, o da última hora...non acaba de resultar!!!Deixamos testemuño gráfico da visita.

FELIZ NADAL A TODOS/AS!!!

Con esta postal queremos felicitar a todos/as os que visitades e comentades no noso blogue. Para todos/as FELIZ NADAL!!!

SEMANA INTENSA!!!

Esta última semana de cole foi moi intensa: ensaios,  a visita de Papá Noel,experimentos, o festival , o photocall.....Aquí vos deixo un resumo do acontecido. Grazas a profe Vane por toda a axuda prestada, a Carlos polas fotos (tamén hai algunha de Karina, a mamá de Marcela. Graciñas .) e a todos/as os que contribuistes para facer desta semana algo especial. Para todos vós FELICES FESTAS!!! (Nota: A sección "Como a vida mesma" tómase un descanso de Nadal e voltará despois das vacacións. Graciñas por entendelo.)

COMUNICÁNDONOS.

Nestas datas tan familiares e de amizade decidimos desexarlles unhas Boas Festas a dúas persoas moi importantes para nós e que xa non vemos tan a miúdo como nos gustaría. Un é o profe Celso,que aínda que está xubilado veu a vernos ao festival e a outra é, Marta,á que botamos tanto en falta e cuxo traballo en Vigo non a deixa vir a vernos.Esperamos que vos chegasen as nosas postais, que vos gustaran e.....a ver se nos contestades!!!

DECORANDO O NADAL.

Este ano, os nenos/as de cuarto, fixeron múltiples e preciosos traballos en Plástica coa profe Puri. Comigo,que non son moi experta nas manualidades, optamos por unha estrela para a árbore  e unha felicitación moi sinxela. Xulgade vós mesmos!!!!

ANTES DE QUE ACABE O OUTONO.

Os nenos e nenas de cuarto de Primaria fixeron unhas estupendas poesías sobre o outono e antes de que remate esta melancólica e chuviosa estación, aquí volas presentamos.

ANTES DE QUE CHEGUE O INVERNO.

Veredes; pensei en facer  un divertido Brincaletras para repasar o vocabulario de outono e pasalo ben aprendendo; e así o fixen (bueno xa xulgaredes vós se aprendedes e  resulta divertido).

O problema veu cando quixen publicalo para que o virades todos. Foi unha gran odisea!!!

Molestei a amiga Ana Martínez para preguntarlle, á profe Vane, que a súa vez falou con Belén Junquera, consultei coa teacher María..... e por fin, grazas a todas, aquí está a obra rematada.

Está publicado grazas a que Belén Junquera subiu  o traballo ao seu dropbox, porque o meu (ao ser recente non ten carpeta pública e para creala teño que pagar).Cóntovos isto porque dín tantas voltas que necesito dicírvolo!!!

De todas maneiras se alguén se lle ocorre como solucionar esto, dicídemo por favor, porque pode existir unha maneira e eu non a coñezo. Grazas.

COMO A VIDA MESMA (VII) (2014-2015)

Xa deberiades saber que non son moito de modas pero, ás veces,  non se pode pechar os ollos ás evidencias. Hoxe , na nosa sección, aparece o famoso vídeo dunha empresa sueca de mobles que está causando furor nas redes sociais convertídose en viral ( Vídeo viral: gravación que foi amplamente difundida  a través de  Internet).Vino xa nalgún blogue , como o da nosa amiga Ana  Martínez (Aula Tic ) ou  no doutra amiga, Natalia Longo (Orientacióncondesa).Ademáis de falalo entre os profes durante a  comida .

En fin, que invita á reflexión e ten varias lecturas. 

Cal sacas ti?

Aproveito para poñervos tamén o outro vídeo da marca que tampouco ten desperdicio ningún.

QUE FACER EN NADAL?

Aquí vos deixo uns recursos de Nadal para  axudarvos nestas datas.

Cal vos gusta máis?

PRIMEIRA SAÍDA.

 No mes de novembro realizamos unha saída a Pontevedra para ver "Antía, Wamba e o regato pequeno". Fomos cos nenos de  3º do noso cole e cos mesmos cursos do centro  de Soutelo. Pasámolo xenial!!!

Como testemuña unhas fotos e unhas crónicas.

DEREITOS HUMANOS.

O 10 de decembro de 1948( en París) foi asinada polas Nacións Unidas,  a Declaración Universal dos Dereitos Humanos. Redatárona  representantes de todas as rexións do mundo e abrangue todas as tradicións xurídicas. Velaquí un vídeo que o explica.

  

Se premedes sobre a seguinte imaxe poderes ver toda a Declaración e os seus 30 artigos.Tamén vos deixo un resumo.

Se premedes sobre esta imaxe iredes á entrada  do ano pasado onde hai xogos interesantes.

COMO A VIDA MESMA (VI)(2014-2015).

Hoxe en "Como a vida mesma" quero mostrarvos este vídeo que publicou Edward Pérez en Youtube. Cando me enfado por todas as cousas que vexo que están mal ao meu arredor sempre hai alguén que me di: "Ti soa non podes cambiar o mundo". Iso provoca moita rabia e frustración, pero debemos trocar o enfoque.As pequenas accións son transformadoras do entorno; é aí onde se produce  a variación. E ti,  que fas para  cambiar o mundo?

CAEN AS FOLLAS.

Desde a Biblioteca Escolar do noso centro propuxéronnos realizar unha decoración de outono  tendo como base unha folla de cartulina. Mirade o que veu das casas dos  nenos/as , que boa man teñen estas familias. Aquí  queda unha presentación coas  follas de 4º , pero non me puiden resistir a subir algunha foto doutros cursos porque merecen moito a pena.

E PERELLA CONTESTOU.

Estivemos moi atentos estes días para ver se Perella atopaba un oco entre as súas múltiples actividades e contestaba ás cartas enviadas. E así foi, enviou dúas  misivas; unha para Ana, que veu no sobre dos nenos/as de 4º (esta Perella é moi aforrativa, jejeje) e outra para a nosa compi, Diana (que tamén lle escribira).Alegrámonos moito de ter novas súas ;  pediu máis ideas, pero polo de agora estamos á espera.

DISCAPACIDADE=IGUALDADE.

Imaxe obtida na rede.

O día 3 de decembro celebramos o Día Mundial das persoas con Discapacidade co obxectivo de chamar a atención e movilizar apoios para aspectos clave relativos á inclusión destas persoas na sociedade. O tema de 2014 é "O desenvolvemento sostible: a promesa da tecnoloxía".

Na súa mensaxe o Secretario Xeral das Nacións Unidas, Ban Ki-moon, ínstanos a que " fagamos todo o necesario para asegurar que as políticas, os programas, as directrices e as tecnoloxías do século XXI estean ao alcance das persoas con discapacidade e teñan en conta as súas perspectivas e experiencias."

Todos temos calidades excepcionais e todos necesitamos axuda en ocasións. Non somos tan diferentes, non cres?

VÍDEO canción El canto del loco “Tal como eres “

COMO A VIDA MESMA (V) (2014-2015)

Hoxe é o Día Mundial da Loita contra a Sida e quero facer mención diso na nosa sección, xa que é unha enfermidade epidémica que existe  no mundo e cobra moitas vidas. 

Interésame ,fundamentalmente, que reflexionedes sobre a frase do cartel (non se refire só á sida) senon ao estado de saúde que pode ter calquera persoa. Non discriminemos  por  razón de raza, sexo, relixión, ideoloxía... pero tampouco demos de lado a alguén que está enfermo. 

A maioría das enfermidades non se escollen, e se foses ti?

RETALLOS DO MAGOSTO.

Aínda non tivera ocasión de subirvos nada sobre o magosto.Aquí vos deixo unhas fotos que testemuñan o ben que o pasamos e de paso, xa vos quedan as crónicas que realizamos sobre ese día.

CRÓNICAS CIENTÍFICAS.

Para que vexades o moito que nos gustou celebrar este día cintífico e o moito que aprendemos, aquí quedan as nosas crónicas.

More presentations from Anabel

AMOR CON AMOR SE PAGA.

Cartel de Myriam Cameros.

O 25 de novembro  foi declarado pola ONU  Día Internacional da Erradicación da Violencia contra a Muller e, como reza o cartel de Myriam Cameros, aínda nos queda moito camiño que recorrer. Xuntos , podemos; porque somos iguais e temos os mesmos dereitos e os mesmos deberes.

Para traballar este día ,semana, mes; tempo(ao fin e ao cabo), deixovos uns enlaces a recursos:

En Inaverycrea , unha compilación de recursos ben ampla.

No blogue de Orientación do CPI de Panxón , Pastora Astray , recolle moito material interesante.

A Junta de Andalucía  nos ofrece estas posibilidades.

No Cuaderno Intercultural  tamén nos falan do tema.

Entrada do ano pasado .

Este conto "O monstro", traducido e con material, elaborado polo Equipo de Convivencia do CEIP Ponte dos Brozos (Arteixo)

COMO A VIDA MESMA(IV)(2014-2015)

Nesta ocasión a, "Como a vida mesma", traemos un vídeo de Save the Children España que nos fala das víctimas da violencia de xénero. Sirva como anticipo ao día 25 deste mes no que celebraremos  o Día Intenacional  da Elimanación da Violencia contra a Muller.

Contádeme; que nos mostra este vídeo?

PERELLA VOLVEU.

Ansiosos estabamos por ter novas súas e a carta chegou. O que nos propuxo a fada foi facerlle suxestións sobre o que nos apetecería facer en clase e ela intentará convencer á profe Anabel (que é dura de roer). Pero.... xa hai novas máis recentes sobre o asunto. Ollade!!!

Xa houbo resposta a Perella!!!Ana escribiulle unha carta e a outra é de....Diana. Si, si , a Diana de 5º. Como ela coñece moi ben a nosa fada tamén quixo enviarlle unha mensaxe. Obteremos pronto a resposta?

Estaremos moi atentos!!!

QUE VIVA A MÚSICA!!!

Hoxe, 22 de novembro, están de celebración todos os músicos, porque festexan a súa patroa, Santa Icía (Cecilia). Esta santa e mártir,ten baixo o seu patrocinio non só aos músicos, senón tamén, a poetas e cegos. Deixovos unha imaxe súa realizada polo pintor Matteo Rosselli en 1620.

E para  celebrar o día unha actución de Pentatonix, un grupo de música a capela de cinco vocalistas.En cinco minutiños fannos un repaso  musical excelente por varias épocas , centrándose no século pasado.

A ver que vos parecen este fenómenos.

PUNTOS Propóñovos un reto: averiguar que compositores, cantantes ou cantigas versionan estas voces privilexiadas. O que consiga cinco nomes obterá cinco puntiños. Tedes de prazo ata o venres 28 de novembro. FELIZ DÍA; MÚSICOS DO MUNDO!!!

DÍA DO NENO E DA NENA.

O 20 de novembro celebramos o Día Universal do Neno e a Nena en conmemoración da aprobación da Declaración dos Dereitos do Neno en 1959 e da Convención sobre os seus Dereitos  de 1989 (este ano cúmprese o 25 aniversario).

Para que saibades máis sobre o tema podedes acceder á páxina da UNICEF e a de HUMANION premendo sobre as súas imaxes.No blogue Lluvía de ideas aparecen unha morea de recursos.

Este vídeo de Guíainfantil.com deixanos moi clariño cales son os Dereitos dos nenos e nenas do mundo.

E para rematar uns xogos.

En rayuela.org ofrécennos este xogo sobre os dereitos.

Unicef tamén ten xogos divertidos.

Aquí queda o enlace á entrada do ano pasado: Preme aquí.

VESTIXIOS DO SAMAÍN.

Aínda que parece que foi onte,xa fai uns días que celebramos o Samaín.Aquí vos quedan os recordos dese día especial.

COMO A VIDA MESMA(III)(2014-2015)

Hoxe na nosa sección, aterra un audioconto que atopei no blogue "Soñando Cuentos". Trátase  de "La gran fábrica de las palabras" de Agnès de Lestrade, deliciosamente ilustrado por Valeria Docampo. Esta fermosa historia, que se mal non recordo nos trouxera Diana á clase unha vez,narra de maneira delicada o que pasa nun país onde xa case non se fala. Os cartos  parecen manexar as situacións e  por ende,os vocablos que se poden pronunciar. Escoitade atentamente  e descubride  o poder da palabra que se di no momento axeitado.

CABAZAS CON PREMIO.

Xa hai varios días que estaba pendente publicar os gañadores/as dos premios do concurso de cabazas que fixemos durante o Halloween-Samaín. Velaquí están as gañadoras de 4º.

PARABÉNS, GAÑADORAS!!!

As miñas felicitacións a todos/as nenos/as que participaron e as súas familias polo estupendo traballo realizado. Para o ano....máis e mellor!!!

APARECE PERELLA,

Despois de moito tempo sen noticias súas, a Fadas Perella volveu a aparecer en escena.Esta vez deixounos unhas deliciosas chuches para celebrar o Samaín.

Estamos desexando ter novas túas, Fada!!!

COMO A VIDA MESMA(II)(2014-2015)

Onte conmemoramos o 25 aniversario  da caída do Muro de Berlín e hoxe, á nosa sección, chegan os Scorpions coa súa mítica canción "Wind of change" (Vento de cambio). 

Os Scorpions son unha banda alemana de hard rock e heavy metal  fundada en Hannover en 1965, sendo a primeira banda de hard rock nacida nese país. A canción que vos traio hoxe publicouse pouco despois da caída do Muro e , aínda que se compuxo con anterioridade.... sería premonitoria?

O estribillo di,  máis ou menos, o seguinte:

Lévame á maxia do momento

nunha noite de gloria

onde os nenos do mañá soñan

co vento de cambio.

Non sería estupendo, que nunha noite gloriosa e máxica, puidesemos soñar con ventos de cambio?

O MURO DA VERGOÑA. (PUNTOS)

Doodle de Google para celebrar a caída do Muro de Berlín.

Fai hoxe 25 anos caía un muro que separaba un país, que partiu ás súas xentes e  segregou os seus sentimentos. Para celebrar ese derrubamento que vos parecen uns puntiños? Aí van:

-Cando  comezou a construírse o Muro de Berlín?

-Cal era o nome das dúas Alemanias creadas co Muro?

-Por que se construiu?

-Cando foi derrubado?

-Existe algún fragmento de muro no noso país? Onde pode verse?

 Para axudarvos un pouco nas vosa pesquisas , deixovos unha presentación de Practicopedia.

A entrega das respostas terá como data límite o próximo luns, 17 de novembro. Ánimo chicos/as!!!

E AS VERBAS FORON CIENCIA...

O luns, día 3 de novembro, celebrouse o Día da Ciencia en Galego e desde o Instituto "Chano Piñeiro" , invitáronnos a participar nuns obradoiros  para celebrarlo.Como somos moi aventureiros e non lle temos medo a nada aceptamos o reto encantados. Cando chegamos ao salón de actos recibiunos o profe Anxo, que nos deu a benvida e nos distribuiu en grupos para experimentar nos diferentes rincóns creados para a ocasión.

Comezamos medindo as nosas reaccións de resposta ante o son e a luz dun láser,seguimos coa banda de Möbius e a súa maxia para conseguir  unha soa cara e un so borde e continuamos con medidores de Ph, chuvias ácidas e globos que se inflan sos misturando bicarbonato e vinagre.

O cuarto obradoiro tiña como  como eixe a natureza: esporas nun microscopio, un zapateiro  de río, o ph desa auga... E rematamos con ondas sonoras e un concerto moi especial feito con copas e auga.

Moitas grazas profe Anxo por invitarnos, chicos/as do instituto por  ensinarnos tantas cousas interesantes e, grazas tamén , a todos/as os que fixestes posible este acontecemento.

Foi un pracer!!!

CELEBRACIÓN DO HALLOWEEN-SAMAÍN.

O pasado xoves  estivemos de festa e queremos que vexades o ben que o pasamos.

Xa empezamos o luns indo á biblioteca a escoitar contos de medo. Ese día,a teacher María, contounos  a historia  de "La asombrosa calabaza de Brunilda"; o martes, tocounos a nós, os nenos/as de 4º ler (xa vos informaremos máis polo miúdo); o mércores, foron os nenos/as de 3º os que nos puxeron os pelos de punta coas súas historias inventadas e o xoves tivemos doble sesión: por unha banda os alumnos/as de 2º con "A min non me comas!" e por outra, a profe Vane, cos peques de 3 e 4 anos recitáronnos uns poemas de Carmen Gil. O tempo na biblioteca rematou co visionado dunha curta "Os difuntos falan castelao"

Despois fomos ao salón de actos para ver unhas actuacións que prepararan algúns cursos coa teacher, fixemos o concurso de cabazas e uns obradoiros de cociña monstruosa. Non podía rematar doutra maneira que degustando semellantes e terroríficos manxares. Foi unha festa estupenda!!!

Os gañadores das cabazas, noutra entrada.
Hoxe é o Día da Ciencia en Galego e fixemos cousiñas moi especiais. En breve, contarémosvolas!!!!

COMO A VIDA MESMA.(2014-2015)

Xa era hora de retomar a nosa sección "Como a vida mesma",non credes?O certo  é que eu botábaa un pouco de menos pero o tempo.... nunca é suficiente. Intentarei levala ao día e ofrecervos, cada luns, a posibilidade de reflexionar sobre algún tema ou feito.

Para comezar ofrézovos unha frase atopada na rede que me pareceu de moito interese. Ás veces non somos realmente conscientes do que as nosas palabras e feitos ocasionan nos demais. Para evitar que o outro se sinta mal, desprazado ou ameazado; analicemos a nosa actitude, as nosa verbas e actos antes de causar males maiores. E se fósemos nós os que nos sentimos mal?

A REPRODUCIÓN.

Estamos acabando o Tema 3 de CM, que trata sobre a reprodución. Como en entradas anteriores, indícovos como acceder a entradas do ano pasado e engadimos algunha cousiña nova.

- Video de "Érase una vez ....
(Clica sobre as imaxes para acceder)

O aparato reprodutor feminino (www.librosvivos.net)

De www. librosvivos.net esta carreira polo saber.

De www.librosvivos.net un xogo para repasar o embarazo.

(Canseime de buscar algo sobre o aparato reprodutor masculino pero todo o que atopaba era demasiado amplo , con moitos máis nomes que aínda non estudamos, e prefiro non liarvos con demasiada información)

FELIZ SAMAÍN.

Imaxe obtida da rede.

Feliz día, nenos e nenas!!! Hoxe , 31 de outubro, cando celebramos o Día do Ensino,chega o Halloween-Samaín ao noso calendario tamén.

Como non podía ser doutra maneira, para festexar esta data deixovos unha historia..... arrepiante!!!

Espero que a gocedes sen pasar moito medo pero non sei se poderedes soportar tanta tensión. 

Adiante, meus valentes a historia nunca a escribiron os cobardes!!!

Esta curta de animación  dirixida por  Jorge Hernádez , cóntanos a historia de Santiago, un neno normal que vive entre zombies ameazado por un temible monstro amarelo.

COCIÑA TERRORÍFICA.

Coa celebración de Halloween- Samaín necesitamos receitas axeitadas para convidar aos nosos amigos e familiares.Os nenos e nenas de 4º ofrécennos unhas propostas innovadoras e arrepiantes. Atrevédesvos ???   Sirva de aperitivo para a festa.

Tamén atopei en Mundo Primaria unhas  táboas con monstros que nos poden vir moi ben para repasar; porque repasar nunca está de máis.

RECURSOS PARA O SAMAÍN.

O Samaín está á volta da esquina e para celebralo temos ao noso alcance infinitas posibilidades.Aquí vos deixo un acceso á compilación que realicei este curso. Tamén quedará no lateral do blogue para que  non os perdades de vista. Hai cousas ben interesantes!!!

Nós, polo momento, xa empezamos coas celebracións e estamos indo á biblioteca a escoitar contos de medo. Hoxe tocounos ler a nós, pero xa volo ensinaremos noutra entrada.

OUTRA DE PUNTOS.

Como o fixestes moi ben na entrega anterior, nesta, imos repetir a experiencia para que collades práctica, vale?

Os puntos tratarán sobre un personaxe que me gusta moito e do que xa falei no blogue.

Xogades por 5 puntos e as preguntas son:

-Cando naceu Mafalda?

-Como se chaman os seus amigos?

-Que odia Mafalda?

-Como se chama a súa mascota e que é?

- Busca no dicionario  o significado do nome do animal. (Lembrade que tedes enlaces a dicionarios na columna da dereita).

Imaxe obtida na rede.

O último día de entrega será o luns, 3 de novembro, que tamén estará incluido.

Ánimo rapaces!!! 

DÍA DAS BIBLIOTECAS.

 O mes de outubro está adicado ás Bibliotecas Escolares e o día 24 dese mes conmemórase o Día  da Biblioteca. A Asociación Española de Amigos do Libro Infantil  celebra este día como homenaxe á labor que desempeñan os bibliotecarios e bibliotecarias.

Este ano Carme Solé é a autora do cartel e Antonio Rodríguez Almodóvar  escribiu no pregón un precioso recordo a Ana María Matute.

Se premes sobre el  accederás ao pregón.

En Bibliotecas Escolares de Galicia atoparás o cartel deste curso e máis informción sobre o tema.

Como recomendación para este día deixovos unha de Docentes para el fomento de la lectura.

Hoxe tamén é o Día da Nacións Unidas, premede na foto para saber máis.

HORA DE LER.

Comezou a clase pola tarde  e con ela a nosa "Hora de Ler".  Cando entramos do comedor, despois de gozar dun anaquiño de recreo, dedicámoslle 30 minutos á lectura. Na primeira semana fixemos lectura silenciosa e cada un leu o que quixo da biblioteca de aula pero na seguinte, xa empezamos con outra dinámica. Trouxemos da casa á aula  libros que nos gustaban  e agora lerémosllos aos nosos compañeiros.O primeiro en comezar foi Marcos Abad, que nos fixo rir co seu "Chistes Infantís. Os mellores 200 chistes para nenos" de Edicións Sálvora. Pero non contentos con isto, Carlos e Iván, axudáronlle para que os chistes fosen dialogados. Velaquí a mostra.

INSPIRA,EXPIRA.

Seguimos avanzando no Coñecemento do Medio e chegamos á Respiración. Deixovos os enalces ás entradas do ano pasado e algunha cousiña nova. A repasar!!!

- A respiración.

-A circulación.

Agora  mirade o que atopei no Espazo Abalar sobre o tema .  Está realizado pola Junta de Andalucía  e traducido ao galego. Ven bastante completiño. Ollade!!!

 A presentación do aparato circulatorio tamén é da Junta de Andalucía pero no atopei traducido ao galego. Para repasar vale igual.