DÍA DE ROSALÍA (2025).

Imaxe obtida na páxina do Concello de Santiago

Este ano o domingo Corredoiro coincide co aniversario da nosa Rosalía. Caprichos do tempo, que nos sitúa onde quere!

DÍA DA POESÍA (2024).

Imaxe de Melanie en pixabay.com

O 21 de marzo é unha data cargada de significado e celebracións:

RECURSOS ROSALÍA (2024).

Imaxe de RJ na Páxina do Instituto Quevedo de las Artes del Humor

A nosa Rosalía , sempre presente, visualízase máis se cabe no mes de febreiro. Por iso vos ofrezo algúns recursos ben interesantes neste marabilloso día da Lingua Nai.

RECURSOS ROSALÍA (2023).

Imaxe de Chuliña

Festexar o Día de Rosalía é un feito que debemos realizar anualmente pero non aproveitala a diario debería considerarse un delito. Para que poidamos gozala todos os días, uns recursos que nos poden axudar.

8 M.

Imaxe de ESCOBEDITO_TEACHER

Nun día comemorativo por excelencia pero igual que outro calquera para reinvindicar a igualdade entre os xéneros, veño a dicirvos que seguimos na loita. Na clase de 3º somos tod@s persoas e, polo tanto, temos os mesmos dereitos e deberes. Sen aspaventos; con accións!!!

RECURSOS ROSALÍA (2022)

Imaxe atopada en metropolitano.gal

Neste mes de febreiro, por descontado rosaliano, compártovos unha compilación de recursos para traballar á nosa escritora máis universal.

CON OLLOS DE ROSALÍA.

Imaxe obtida en redbubble.com

Antes de que remate febreiro, mes rosaliano por excelencia, tráiovos a estrea mundial da nosa homenaxe deste ano. Como non podía ser doutro xeito fixémolo en colaboración coa aula da profe Vane, Infantil B. A idea foi achegarnos á poesía da autora a través as súas descricións, enumeracións... dos elementos da natureza. Para iso escollemos varios fragmentos representativos para  recitar e reproducir en forma de láminas. Esta última parte está aínda en fase de post- produción pero podemos mostrar o recitado. A ver que vos parece esta historia en tempos de Covid!!

Obtido no canal de Youtube de VANESSA ARCA

Tamén creamos este ano ( a profe Vane e eu axudei un pouco) unha presentación co resultado de todas as celebracións de anos anteriores. Esperamos que vos guste!!!

Non queremos esquecer que o 28 de febreiro é o Día Mundial das Enfermidades Raras. Consultade a entrada do ano anterior aquí.

RECURSOS ROSALÍA.

Lámina de Rosalía de Castro de Esther Voltá

Como estamos na semana da celebración do Día de Rosalía vouvos compartir uns recursos para traballala que poden ser interesantes.

CELEBRACIÓN ROSALÍA 2020.

Imaxe atopada na rede

Como o Día de Rosalía, que foi o 24 de febreiro, estabamos en pleno Entroido, no cole celebrámolo o venres 28.

Antes de contarvos este día, falareivos do agasallo que levamos para a casa antes das vacacións de Carnaval. Trátase dun visor de constelacións, onde localizar a estrela de Rosalía de Castro. Desde decembro de 2019,a  nosa poetisa querida, brilla na constelción de Ofiuco, a 240 anos luz. Para poder vela sempre que queiramos fixemos este visor. 

AI, ROSIÑA!!!!

Ilustración de Eva Casais

Por fin chegou o momento!! O 24 de febreiro celebramos o Día de Rosalía de Castro, unha das nosas autoras máis universais e querida por todos/as. Cada ano intentamos facer algo especial para conmemorar a data do seu nacemento  e  nesta ocasión non ía ser menos.

CELEBRANDO A ROSALÍA.

Portada do libro "Rosalía" de Luisa Carnés.

Pois chegou o día no que puidemos celebrar a nosa poetisa máis universal, a que nos inspira profudamente e nos guía dentro do ámbito das nosas letras: Rosalía de Castro.

Xa vos comentei que tivemos unha semana moi atarefada na biblioteca: o luns, escoitamos o recitado, polos alumnos /as de 5º e 6º, de "Adios ríos, adios fontes"; o martes e o mércores, fomos por turnos a pintar uns retratos da autora para  elaborar un cartel e xoves e venres, fomos a escribir poesías de Rosalía para encher un bote con parte do seu legado.

Na clase realizamos uns preciosos marcapáxinas que elaborou a profe Eva de 1º. Xa eran moi chulos e nós démoslle cor. A ver que vos parecen!!

Pero a verdadeira festa vivímola nas aulas preparando o recitado de "Del mar azul las transparentes olas", poema pertencente a "En las orillas del Sar" (1884).Este ano escollimos, a profe Vane e máis eu, unha poesía en castelán porque era o que mellor nos acaía dentro do noso proxecto do mar. Aínda así ,non puidemos renunciar a que o galego estivese presente e copiamos un fragmento de "Cantares Gallegos", que tamén menciona o mar.

Volvemos a liarnos a manta á cabeza e pedímoslles ás familias vídeos con imaxes mariñas. Obtivemos , coma sempre, unha estupenda resposta por parte de todos/as e ,coas imaxes e gravacións dos nenos/as, saiu esta fantástica montaxe.

Montaxe realizada pola profe Vane.

E para celebrar o día, enchemos as nosas botellas (as que podería arrolar o mar) con area, cunchas, moedas de ouro e a poesía da autora. Un fermoso tesouro que agochaba a Esencia de Rosalía.

Montaxes realizadas con Pizap.

Solo podo rematar esta entrada dicindo : LONGA VIDA A ROSALÍA e GRAZAS a todos os participantes!!

DA LINGUA MATER Á ROSA INSIGNE.

Retrato de Mónica Jiménez

Con so dous días de diferenza celebramos o Día Intenacional da Lingua Materna e a data de nacemento da nai do Rexurdimento Galego. Curioso, non si?

Volve Rosalía ás nosas aula, onde sempre está presente, para unirnos nun ilusionante proxecto común. Recorre os nosos corredores para visitar a biblioteca e agasallarnos con recitados e plasticidade.

Como este ano o 24 de febreiro coincide en domingo traballamos toda a semana pero o colofón final será o luns 25 (cando xa teremos que recibir o Entroido. Isto é un non parar!).

Para festexar este día, e non adiantar as sorpresas que temos para mañá, quero facerme eco da iniciativa deste ano do Concello da A Estrada. Xa gozamos na pasada edición dun expléndido traballo de recitado da autora polo mundo adiante e nesta ocasión sorpréndennos  cunha marabillosa versión do "Stand by me" de Ben E. King. Nela colaboran  estupendos artistas estradenses, algún dos cales temos o pracer de coñecer : profes do instituto en Forcarei, papás de alumnas do cole.... Canta arte nos rodea!

Gozade desta homenaxe, merecida e inmensa, coa que os estradenses (nos que me inclúo), queren honrar a Rosalía.

Obtido no canal de Youtube de  Concello da Estrada.

ROSALÍA; ESTÁS EN MIN!!!

Entradas de anos anteriores, aquí.

ROSALÍA PRESENTE.

Imaxe creada por Iria Ribadomar para Deica Creacións.

Despois do noso recitado familiar, quixemos ter un detalle coas nosas familias. Primeiro, visitamos a aula dos nenos/as de 3 e 4 anos para compartir con eles o visionado da nosa creación e despois, repartímoslles o dvd coa gravación e unha bolsiña con bombóns e unha tarxeta de agradecemento ás familias. Creo que aos nenos/as lles gustou, e ás familias? Desexamos que tamén.

Montaxe realizada con PiZap.

E para deixarvos un estupendo sabor de boca, compártovos esta producción de Lucas Terceiro realizado para o Concello de A Estrada. Pon en valor a relevancia universal da nosa poetisa máis recoñecida.

Obtido no canal de Youtube do Concello de A Estrada. PARABÉNS A TODOS /AS OS ARTÍFICES!! (Que ben traballa a xente de A Estrada!!! Nada que ver, que eu sexa dalí ! 💚💜💛)

A NOSA ROSALÍA.

Imaxe de Luz Beloso.

Hoxe ,24 de febreiro, celebramos á nosa querida Rosalía de Castro.Cada vez ten máis repercusión a data que conmemora o seu nacemento e non é para menos. Muller intrépida, que escribiu en galego, foi estandarte da nosa Lingua; esa que está en horas incertas. A nosa aula, compartiu unha fermosa iniciativa cos picariños de 3 e 4 anos, para ensalzar a figura da autora.

Implicamos ás familias dos nosos alumnos/as para facer un recitado familiar do poema "Alborada". Este foi o resultado. Espero que o gocedes tanto, como nós a súa realización.

Premede aquí, para acceder  a entradas anteriores.

Premede sobre a imaxe para ver o recitado.

Grazas aos picariños. á profe Vane, ao perellos de primeiro, a Josele (que non teño o pracer de coñecer), ás familias e a todos aqueles que fixestes posible este proxecto. Rosalía estaría orgullosa; eu estou,  namorada do resultado.

FELIZ DÍA!!!

NO TEU DÍA.

Imaxe  atopada na rede . 

Preme nela para acceder a entradas anteriores sobre este tema.

ROSA
Ai,  Rosa da roseira,

 se volveses a mirar

erguerías alto o pranto

voltarías a chorar.

A xustiza non se cumpre

se non chega pola man,

e os fillos de Galicia

polo mundo adiante van.

Visionaria do teu tempo,

defensora do inmortal,

esta Lingua que amamos tanto

ferida de morte vai.

A Negra Sombra que se cerne,

co seu manto sobre nós está

enchendo de néboa espesa

todo aquilo  ao que amar.

Pero teño esperanzas limpas,

que no futuro han chegar;

co traballo de todos xuntos

un tempo mellor virá.

                                               Anabel García

Hoxe, 24 de febreiro, que celebramos o Entroido no cole, facémolo nunha data importante para as nosas Letras e a nosa Culura. Tal día coma hoxe nacía Rosalía de Castro en Santiago de Compostela e comezaba a vida dunha loitadora que nos serve de exemplo en moitos ámbitos vitais. Para celebrar o seu día, na clase de 2º (e os nenos/as de 3 anos tamén) traballamos o poema da autora "Parece unha rosa".Cada un escribiu unha estrofa en depresores de cores e despois preparamos unhas bolsiñas coa estrofa e incluimos a poesía enteira. Así nos quedou.

Aquí vos deixo unha canción con pictogramas elaborada polo CEIP. Plurilingüe "Anxo da Garda"( A Coruña 2015). Música: poema "Adiós ríos, adiós fontes" de Rosalía de Castro interpretado por Amancio Prada e a Filharmonía de Galicia.

E tamén unha escolma  de Rosalía para conmemorar o seu día feita polos veciños e veciñas da Estrada. A ver que vos parece!!!

DÍA GRANDE.

Imaxes de Rosalía creadas polas artistas Aurora Cascudo,Uqui Permui, Aladara Prado e Paula Mayor.

Xa chegou o día!!!! E fixemos unha pequena e preciosa homenaxe no cole,  que vos presentaremos en breve.
Dende a nosa biblioteca ofrecémosvos a canción "Rosalía pequeniña", do libro-disco do mesmo nome, que editou Galaxia na colección Sonárbore en 2013. Está ilustrado marabillosamente por Marina Seoane e cantado por unha serea que se chama Uxía.
Sobre esta cantiga fixemos  ilustracións de estrofas e recitado da mesma. Ao final, cantámola entre todos/as. Participaron varios cursos, entre eles primeiro, pero a profe sólo o celebrou, porque estivo un pouco pachucha. Graciñas por deixarme participar!!!

Aquí tamén aparece un estupendo LIM para coñecer mellor á nosa autora.

E para rematar, aí vai a miña humilde homenaxe  a Rosalía que sae  da pluma e o papel. Que vos guste!!!

Montaxe realizada con PiZap.

ESPERANDO A ROSALÍA.

Imaxe do cartaz do Concello de Silleda para  o Día de Rosalía.

Mañá será un día moi especial para as nosas Letras, porque celebraremos o 179 aniversario do nacemento  dunha das nosas escritoras máis senlleiras. 

Rosalía de Castro nacía un 24 de febreiro de 1837 en Santiago de Compostela e viña ao mundo para levar o idioma galego ao recoñecemento mundial. Se queredes traballar este día , aquí vos deixo algunha das moitas opcións que hai:

-No blogue colectivo Actividades LIM aparecen recursos sobre a autora.

- Na Coordinadora Galega de Equipos de Normalización e dinamización Lingüística atoparedes cousiñas de interese.

-En Hablandodetodounmucho hai moi bo material.Premede sobre o enlace.

-Tamén podedes botarlles un ollo ás entradas de anos anteriores. Premede aquí.

-Utilizando de base esta fantástica presentación de Educa Barrié, creei un par de brincaletras sobre Rosalía. Teñen as mesmas preguntas pero para os máis cativos teñen a opción de escoller e para os maoires hai que escribir.

Este para os máis pequenos.

Este para os máis grandiños.

ETERNA ROSALÍA

Como xa anunciei no día da nosa poetisa por excelencia, celebramos o seu aniversario por todo o alto. Traballamos arreo durante unha semana para facer un mini proxecto colaborativo cos  Picariños da profe Vane.
Comezamos na clase de 4º estudando a biografía da autora e creando, en conxunto, unha poesía sobre sobre a mesma . Mentres nós  escribiamos e gravabamos as voces, en Infantil,producíase unha "eclosión creativa" sen precedentes e que deixou a máis dunha  ( por exemplo, unha servidora) gratamente sorprendida.Coas marabillosas ilustracións dos peques e coa nosa humilde poesía, fixemos un libro biográfico en verso.
Aquí o deixo en forma de presentación , con imaxes e voces, envolto polo tema "Tick Tock (intrumental version) de Josh Woodward.

Grazas, profe Vane, por esta presentación tan coidada e exquisita. Se premedes aquí, poderedes ver a homenaxe que lle fixemos o ano pasado a Rosalía. Non se trata de comparar senon de sumar.

SEMPRE ROSALÍA.

Caricatura de Rosalía por Mario Rodríguez

Como cada 24 de febreiro queremos celebrar que viñese ao mundo nesta data unha creadora de versos, unha feiteceira da palabra que honrou a súa Lingua (a nosa ) escribindo nela e converténdose en referente literario e poético dunha época. A súa obra é coñecida no mundo enteiro e foi traducida a varios idiomas. Tamén foi musicada. Sirvan como homenaxe todas estas manifestacións musicais baseadas na obra da autora.

Curiosa mezcla de Rosalía e Amy Winehouse da artista Elisa.

Pero isto non remata aqui, non, porque celebramos o día por todo o alto e temos probas diso. Permanecede atentos se queredes saber máis. Aí vos quedan unhas pistas!!!

VOLVE ROSALÍA!!!

Como xa anunciabamos pola mañá, hoxe conmemoramos a data do nacemento de Rosalía de Castro. Queremos sumarnos á iniciativa da Asociación Galega de Escritoras e Escritores  que pretende instaurar este día como propio da autora para recitala, recordala e homenaxeala nun día especial que se traduza no gozo de vivila durante todo o ano. Porque queremos a Rosalía  libre e permanente, sincera e denunciante, de todos e para todos.

Esta é a nosa aportación á causa. Gozádea intensamente!!!

Grazas , Picariños, por ensinarnos e querernos tanto; grazas,  profe Vane, por este estupendo vídeo e todo aquilo que se queda na casa e grazas ,a aquel que asesora, pola paciencia e o ensino.