PLANTAR AMORODOS.

Imaxe de Almeida en Pixabay.com

A comezos do mes de maio, todo o alumnado de primeiro participou nunha actividade moi especial: a plantación de amorodos. Foi unha experiencia divertida e chea de aprendizaxes, na que todos colaboramos para coidar as nosas plantas.

A iniciativa veu da man do noso PDI: Tesouros Verdes de Galicia, que nos propuxo facer dita plantación a todo o cole. Fomos por quendas.

Primeiro, preparamos a terra nas nosas macetas e fixemos pequenos buratos para colocar as plantas de amorodo. Despois, plantámolas con moito coidado e regámolas para que puidesen medrar fortes e sans. Aprendemos que as plantas necesitan terra, auga, luz do sol e moita atención para dar os seus froitos.

Durante todo o mes estivemos observando os cambios que se producían cada día. Foi moi emocionante ver como as plantas medraban pouco a pouco.

A finais de maio chegou a mellor parte: os amorodos xa estaban maduros! Recollémolos con moita ilusión e tivemos a oportunidade de probalos. Estaban deliciosos! Ademais de aprender sobre o cultivo das plantas, puidemos gozar do sabor dun froito que nós mesmos axudamos a producir.

Montaxes realizadas con Canva.com

Esta actividade ensinounos a importancia do traballo en equipo, da paciencia e do respecto pola natureza. Sen dúbida, foi unha experiencia que recordaremos con moito cariño.