PROGRAMA XOGADE.

Logo do programa Xogade

O pasado mércores 4 de xuño celebramos unha xornada moi especial e divertida no pavillón do colexio de Carballedo. Participamos nun encontro organizado dentro do programa Xogade, onde nos xuntamos con outros nenos e nenas doutros colexios da zona para pasar un día cheo de xogos, risas e compañeirismo.

Organizámonos por equipos mesturados con alumnos e alumnas doutros centros, o que nos permitiu coñecer xente nova e facer novos amigos.

Durante a xornada participamos en moitos xogos tradicionais e cooperativos, que puxeron a proba tanto a nosa habilidade como o traballo en equipo. Entre os xogos que máis nos gustaron estiveron:

-A corda, onde puxemos a proba a nosa forza e coordinación.

-A carreira de sacos, que nos fixo saltar e rir sen parar.

-Os bolos, que requiriron puntería e paciencia.

-O xogo do tres en raia xigante, que fixemos por relevos

-O pano, que nos fixo correr e estar ben atentos.

-Os zancos, que foron todo un reto para manter o equilibrio.

-O minigolf, onde practicamos a precisión.

-E tamén xogamos coa goma elástica, facendo diferentes figuras e pasos en equipo.

Cada actividade estaba preparada con moito coidado para que todos e todas puideramos participar e divertirnos. Os mestres e mestras, así como o persoal organizador, guiáronnos en cada proba e animáronnos en todo momento.

Montaxes realizadas con Canva.com

Para rematar a mañá, fixemos un baile final conxunto, no que todos os colexios bailamos ao mesmo tempo. Foi un momento moi bonito, cheo de ledicia e unión entre todos os participantes.